All About Printing

بسم الله الرحمن الرحيم

السلام عليكم ورحمة  الله وبركاته

معلش بس يامهندسين أنا عارف اني عمال اعمل صفح كتير وأوديكم شمال ويمين بس عشان نخلص المشاكل اللي مقابلانا كلها وان شاء الله بمجرد اننا نتعلم نعملها بعدها هاتعملوها بسهولة كبيرة ياريت ياريت كله يقرأ الصفحة ده هاتاخد من وقتك كام دقيقة بس المشاكل ده لو لسة مقبلتهاش هاتقابلها أو هاتقابل منها حاجات.


أول حاجة اللي ملخبطة ناس كتيييييييير الطبع Normal ولا Mirror 


بصوا ياشباب باختصار شديد لو هاتطبع علي ال Bottom Layer يعني علي النحاس يبقي تطبع علي الورقه Normal .


نقول ليه بس اللي هايتلخبط منها بلاش يقرأها أصلا لو انت معاك ورقة شفافة وعاوز تكتب عليها حاجة وتشفها من الناحية اللي مش مكتوب عليها يبقي اساسي هاتكتب الكلام بالشقلوب حلو لو انت بقي معاك قلم حبر من الرخم اللي بيطبع علي الورق اللي بيجي عليه وكتبت بيه علي ورق كلام بالعدل عادي يعني وجيب حطيت الورقة ده علي الورق الشفاف مش هايطلع مقلوب أكيد اه طب نقلب الورق الشفاف ونبص اكيد هايتعدل نفس الفكرة هنا احنا هانطبع علي ورق عدل وهو لما ينزل علي النحاس هايتقلب بس انت بتبص للنحاس من الناحية التانية يبقي هايتعدل تاني ونرجع للمختصر عشان الناس متتلخبطش  لو هاتطبع علي ال Bottom Layer يعني علي النحاس يبقي تطبع علي الورقه Normal 


نيجي لحاجة مهمة جدا ناس كتير اختلفت علي الورق اللي بيطبع عليه أنا _أعوذ بالله من كلمة أنا_ بتجاربي المتواضعة والقليلة استخدمت أنواع كتير:-


1:- ورق مجلات: وده كان مفعوله علي حسب نوع الورقة اللي بطبع عليها الغلاف غير الورق التاني من الاخر بلااااااااااااااااش ورق مجلات


2:-ورق بلاستيك شفاف هو ورق بلاستك حراري عشان طبعا عارفين ان الطبعة الليزر بتولد حرارة عالية ده فيه مشكلتين قابلوني اولا الحبر مبينزلش عليه كويس ومحتاج Quality عالية أوي من الطابعة تاني مشكلة مع الضغط بالمكواة برده الحبر مبينزلش كويس ممكن يكون العيب مني بس أنا مرجح الورق خالص خالص بس احنا ممكن نستخدمه في طريقة اغلي بكتير واكتر احترافية بكتير اوي اسمها Photo Resist هاكلم المعيد لو ابقي اقولهالكم لأنها احترافية جدا ومن غير بهدلة ومكواة والكلام ده


3:-ورق الجلوسي Highly Recommended :-
 فيه نوعين انا استخدمتهم أول نوع فيه عيب والتاني فيه عيب تاني (يمكن التغاطي عنه)


 النوع الأول :- انا كنت جبته مش فاكر نوعه بس جبته من الفجالة كان رزمة 20 ورقة ب 15 جنيه ده عيبه ان مكنش كل الحبر بينزل علي النحاس حاجة رخمة بس خفيف علي اي طابعة 


النوع التاني:- ورق طباعة جلوسي من نوع Epson مكتوب علي ظهر الورق Photo paper ده الرزمة 20 ورقة ب 17.5 او 17 جنيه علي حسب المكتبة اللي بتجبها منه طبعا في الفجالة ده ممتاااااااااااااااااااااااااااااااااااااز عن تجربة شخصية ده يخليك تطلع الPCB بروفشنال اخر حاجات كتير بس عيبه انه تقيل فممكن يعلق في الطابعة الحل ايه هاشرحه بالصور
طبعا الحل ده لو انت واخد معاك برنامج بورتال عند الراجل لو مش واخد نفس الفكرة الاوبشن بتاع الطابعة

كده خلصنا من موضوع الورق والNormal والكلام ده فاضل تطبع ازاي.
 فيه 3 طرق ان شاء الله مضمونين
أول طريقة:- البرنامج البورتال وده الطريقة اللي بفضلها ولو ربنا سهل هاحطه عند مكتبة بره الكلية 
وهاتطبع مباشر زي الصورة ده ظبط الاعدات زي ده بالظبط لو اتلعب فيهم ولا حاجة

الصورة اللي جاية لو هاتطبع عند حد عنده ويندوز 7 مينفعش XP لأن امتداد xps مبيشتغلش علي ال xp :(

اما الصورة اللي جاية PDF وبيشتغل عند كله الا لو مكنش عنده PDF Reader ده تبقي حاجة عجيبة

واختارو نفس الحاجات ده

بصوا بقي انا كتبت في الصفحة ده اكتر ماكتبت في موضوع التعبير بتاع الثانوية بالله عليكم اللي يقرأ الموضوع يعمل اي حاجة لايك كومنت هنا علي الجرب اي حاجة عشان انا حاسس اني بكتب الكلام ده لنفسي وبكره الناس كلها هاتسألني نفس الاسئلة المتجاوبة هنا